بەرەبەیانی ئەمڕۆ پەیامنێری ناوەندی ڕاگەیاندنی فەلەستین لە غەززە، هەواڵی زنجیرەیەک هێرشی بەرفراوانی سوپای سەهیۆنی بۆ سەر ناوچە نیشتەجێبووەکان لە شاری غەززە و کەمپەکانی ناوەڕاستی کەرتی غەززەی ڕاگەیاند، کە بووەتە هۆی شەهید و برینداربوونی ژمارەیەکی زۆر لە خەڵکی سڤیل.

بەپێی ڕاپۆرتەکان، فڕۆکە جەنگییەکان و فڕۆکە بێفڕۆکەوانەکانی رژێمی داگیرکەر لە نیوەشەوی ڕابردووەوە چەندین ماڵی نیشتەجێبوونیان لە باکووری گەڕەکی "نەسر"، ناوچەی "سەحابە" لە گەڕەکی "دەرەج"، هەروەها شاری خان یونس کردووەتە ئامانج. هاوکات، هەلیکۆپتەرەکانی سوپای داگیرکەر هێرشیان کردە سەر کەمپی "نوسێرات" لە ناوەڕاستی کەرتی غەززە، کە بووە هۆی ئاگرکەوتنەوەیەکی بەرفراوان لەو ماڵانەی نزیک مزگەوتی "قەسام" بوون. لە کەمپی "بورێج"یش خانووێک کرایە ئامانج کە لانیکەم شەهیدێک و چەند بریندارێکی لێکەوتەوە.

یەکێک لە کارەساتبارترین هێرشەکان، بۆردومانکردنی قوتابخانەی "فەلاح" بوو لە گەڕەکی "زەیتوون"؛ قوتابخانەیەک کە میوانداریی سەدان ئاوارەی دەکرد. ئەم هێرشە نەک تەنها دەیان برینداری لێکەوتەوە، بەڵکو بووە هۆی شەهیدبوونی ١٣ کەس، لەنێویاندا ژن و منداڵ. هێزەکانی بەرگریی شارستانیش کە بۆ فریاگوزاری چووبوونە شوێنەکە، کەوتنە بەر ئاگری فڕۆکە بێفڕۆکەوانەکانی داگیرکەر. لەم هێرشەدا فریاگوزارێک شەهید بوو و چەند کەسێکی دیکەش بریندار بوون.

هاوکات، ماڵەکانی بنەماڵەی "ئەبو کمیل" لە گەڕەکی "دەرەج" و بنەماڵەی "دەعالیسە" لە "نوسێرات" کرانە ئامانجی هێرشی ئاسمانی. بەهۆی ئەم هێرشانەوە، بڵێسەی ئاگر لە ماڵەکاندا بەرزبووەوە و زیانێکی بەرفراوانی لێکەوتەوە.

بەپێی ئامارە سەرەتاییەکانی سەرچاوە پزیشکییەکان، تەنها لە چەند کاتژمێری ڕابردوودا لانیکەم ١٣ شەهید و دەیان بریندار لە هێرشەکانی سەر گەڕەکەکانی "دەرەج" و "زەیتوون" تۆمار کراون.(İLKHA)